مؤمل الموسوي
كاتب الطيف بقلم خلص رصاص
وحمرة عيون الفجر هوسة دفاتر
والوجوه الواگفه اباب النهار
متانيه الليل شكتبها
وخايفه من رسومها
شيقراها باجر
والعبارات التسولفها الحياطين
هاي أصلها نجوم مسبيه سهر
والفقير العاف دينه...
وصدگ التمثال بي روح ويعبده
هاي كلها الليل كاتبها صور
عفيه ليل شكثر شاعر
عفيه ليل شكثر كاتب
خايفين..
كاتب اللوحه البچت رسامها
بسوگ الخناجر
لأن باگ الوانها الخوف الجديد
وريحة الدم القديمه
معلگه بهيئة تراث
واحنه ماندري شكتبنه
مدري تتگاطر ملامحنا
عشگ ذيچ السنين
مدري مافهموا شكلنه
مدري تقرانا الشوارع
بيت واگع من قصيدة
تايبين
كل فرد
كل فرد بينه روايه
وناسنه مغيمه سوالف
بس چبيره بعين الأخرس
من خلص حمال عمره
وحاط دمه بجيب تاجر
