وسام السويعدي
ااخ ياكابوس طيفك
ايگلب ابروحي عناوين الجريدة
وينده الدمعه وتخط ترسم
عله الوجنه تصاوير وقصيدة
وانته تدري!!
ابد ماملچوم من بگت الضحگ!
من شفتي غنوة
وتدري بضلوع الگلب للضيج تجوة
وانه ادري !!!
رحلت اوداعك طويله
وشاد الروح اعله جفك جنطة صوغة
ضحگتي ومتني متاع لليل دربك
والصور برده اعله عينك
لاتشيل ارموش جفنك
تفضح الجرح وي دمعك
ااخ ياحزن الليالي الفارغه
ويسيل دمعك!!
وين ما ينصدم گلبك
الحزن يمشي ويدمك
وانته تدري!!
العوز باب!!
الضيج باب!!
وانه گتلك تاني روحي اتفيض غيمة
ليش حليت الشعر بحضان غربه
وانه گتلك ياماگتلك
سجن گلبك فگه مادام الغصن بيه روح خضره
ليش چا بأول محطة
اشراع ترفعهن اديـك
وجا گلتلي العشره سفره
وخيط حبك عنگبوت
وجا گلتلي بأول الخطوات
مو صاحب طويله
واني حافي !!!
وجان دربك شوج وبهندس افوت
ومادريت ومادريت!!
الغيمـــــه ذيچهه
الكبرتها بخيط دخان الجكاير
تمطر بديره غريبـــــه
وهذا جفي اسنين عمره
يبحر ابروحك سفينـــــه
ايمشط ايلاعب گذلتـــك
يضفر الروچه گصيبــه
ومن تحط صفنه اعله حروف الرسالـه
وتحس تمشي!!!
شهگت الدخان من بين الاصابع
والضوه ايعاين عليك
والظرف جثه وتحنط !!
ابشوگ جلمات الرساله
والرساله اطرز الشباج گمرة
اتبوس كل رازونه هنــدس
وكحله برموش اليالي تضوي لاله
