ساحة التحرير .. شفناها مثل الشذر .. سلميّة ترس العين
ثقافة شعبية
2019/11/22
![...](/uploads/posts/alsabaah-23075.jpg)
+A
-A
سعد صاحب
انزف وجع يا كلب / صبي جمر يا عين / خلي الشرار اليصب / يحرك ضوه الخدين / مقهور مامش فرح / مقهور مامش ونس / يمكن يعيش بلحد / يمكن يعاني الاسر يمكن سجين بحبس /خمينه كاع الغرب بس ما لكينه اثر / كالوا اجانه امس / كالوا اهالي السفر / بالليل فوك السجج سافر على الاندلس / واركضنه فوك الدرب / شفناه مثل الشذر شفناه مثل العرس / شفناه شدة ورد / ما يبخل بكل عطر ما يبخل بكل لمس / شفناه شايل علم واكف يداعي بوطن / مليان عيد وضوه ومليان كيف وغرس / بالليل يضوي كمر / لو صار وكت الصبح يندار مثل الشمس / يضوي على الصوبين / ردناه النه يرد / بسناه فوك الزند والايد والجفين / وانزلنه فوك الجدم / نبجي بواجي الطفل ونبوس الرجلين .
ضياع
هلبت تردني الي من بين هاي الدور / هلبت تردني الهلي ريشه بجنح عصفور / هلبت ترد يا وطن بعد الهجر للناس / هلبت يرد للجسم اصبع غصب مبتور / هلبت يرد للجسد فد يوم ذاك الراس / هلبت يروح الحزن سفرة البلاد الجور / هلبت توالي الوكت تصفى الليالي اعراس / كلشي الك يا وطن كلبي المجرح وهب / حر انه مثل الهوه ومحبوب مثل الرطب / شوك يتغده الجمل / ويشيل فوك الذهب / حصتي التنك والصفر والغيري صار الماس /
جرح
كلما يفيض الجرح هم ومرار وقهر / اكثر يزيد العزم واكثر تزيد النفس / قوة وصلابة وامل / وتصير شوكة بجفن / كل عايل وكل وكح / كل مايل وكل شرس / هذا امتحان الصعب والشاطر الي نجح / والفاشل الما اخذ كل عبرة من الدرس / لا ما يعوف الاهل بالريح لو ينفرد / كد ما يطشر كرم / ظنيت فايخ غني / بس الحقيقة ولا بالجيب شايل فلس / ويغني عاش الوطن / والروح تركص ردح / والكاع مالت غنج من كد هذاك الردس .
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة