سعد صاحب
شمسوين ذولة الوادم الحفاي ...
ماعدهم جرم وذنوب,
مثل لون الوفر عدهم بياض كلوب,
عدهم بس خشب يصبح سرير النوم..
لكن من تصير الدنيا وكت اغروب...
يتحول كمنجه وناي!
مر بيهم شبح وكت الصبح مرعوب...
واحد صار زنده هناك,
واحد صار راسه حذاي!
ننشد ليش هذا الصار ذاك اليوم..
ياكل بالضمير اللوم,
جواب من الضحايه يصيح اهل العار..
اهل الموت اهل البين اهل الثار,
باعوهم رخيص السوم..
باعوهم على الشراي!
ويغيب الفرح بالغيم نوره ويختفي اهلاله..
ويسافر طفل للموت..
من خد الورد اترف,
اخذني الجنة الفردوس يا عيني اخذني وياك..
جنح عصفور ما بين الدواير رف!
من غابة نخل يوصل هذاك الصوت...
جا كل يوم مذبح بالعراق وطف؟
جا كل يوم من عدنه العزيز يموت؟
جا كل يوم كومه اعظام بالتابوت؟
جا كل يوم امشي بالجنايز للنجف زاتوت؟
جا كل يوم رايح جف؟
جا كل يوم دمع العين ينزل فوك ذاك الدف؟
جا كل يوم اغرك بالدمع وبجاي!
ويموت الورد من خوف بسلاله,
شمسوي اليبيع من الصبح باله؟
يدفي الناس بالمعطف..
لابس بالصدر مصحف..
ما رايد قصر عالي ولا حراس,
ما رايد رصيد يضمه بالمصرف,
بس رايد يشوف الابتسامه بشفة اطفاله!
دكان شكثر خلان ساعات الحزن جامع,
يلم كلمن شريد وخايف ومحتار والضايع,
احبابه اليتامى والشباب التشتغل مرات عماله,
رب الكون ما يرضى ولا تقبل سماواته..
يرد بالجيس لعياله..
غبش وي البرد وشكد ظلوم شتاي!
طبع الموت ياخذ ناس خياله..
شمسوي اليبيع البيض؟
يحمل لوم من الناس يحمل غيض..
جاباها الليالي اركاض للساحات متسارع,
رحلة موت ما بين المطر والريح بين الكيض!
مره جفوف تتناثر على الشارع..
مره الدم يمر وسط الشوارع فيض!
مره اسهام ترميني بشماته عيون ذوله اعداي!
ظلام وما تشع فوك الدرب لاله..
ولا واحد يكل للموت يا خايب ولك لاله,
شمسوي اليبيع من الفجر خرده؟
تجاعيد الزمن طرز وسط خده,
مهافي باع للسواح ودواليب ومخده,
فوك من القميص يحط الك ورده..
خالي الجيب غير الطيب والضحكات ما عنده ,
لكن بالحقيقه هموم عنده هواي!
احس وسط الصدر نبتت الف فاله..
احس الخايف المذعور يعثر دوم بخياله..
واكولن ليش يا كل الارض يا ناس يا دنياي,
شمسوي اليبيع الجاي؟
بس هوه الوفي الحساس,
بس هوه اليريح الراس,
من كل الظنون التذبح الانسان والوسواس..
من كل اه من كل اوف من كل داي!
هوه الدوشك المفروش هوه اغطاي!
بس يا حيف ما دامت سعاداته,
صعدت صوب ذاك الغيم حسراته...
طارت للسمه العالي استكاناته,
يا ذاك السماور دم صبح متروس لا مو جاي!
وشما صار وشما راح بينه ايصير..
لو كل الدهر تفجير..
كل غبشه اليحب صوب الحبيبه ايطير..
ساحة طيران الروح بيها اعشاي!
بيها يصيح تالي الليل وحده الديج..
يا ذيج المطاعم ذيج,
والزاد الهني بس بيج,
ما بين الجفوف يدور ذاك الكاس..
ما بين الحبايب والربع هلكد لذيذ اغداي!!
