ميسان ترتل الأناشيد الملائكيَّة للشهداء
ثقافة شعبية
2022/03/23
![...](/uploads/posts/alsabaah-127963.jpg)
+A
-A
العمارة: كاظم غيلان
أفرزت تشرين ثقافتها التي عكست روحها الصافية، فكان لشعر العامية حضوره البهي الذي جسدته مؤخراً فعالية كبيرة أقيمت في قاعة قصر المؤتمرات بمدينة العمارة وبجهود ذاتية حرص عليها نخبة من شباب تشرين وبحضور شعبي خالص تصدرت مقاعده الأولى والدة أحد الشهداء، وفي خشوع بهي أيضاً عرض فيلم وثائقي تخللته بالصورة والصوت مقاطع لعدد من أبرز شهداء تشرين (صفاء السراي، أمجد الدهامات، عبد القدوس، ثائر الطيب) فكان للدمع حضوره أيضاً. القصائد التي قرئت في الفعالية حملت مضامين جديدة خارجة عن سياقات سيرك المهرجانات السائدة الصاخبة بالصراخ والتصفيق، وكان للشعراء المشاركين إلقاء هادئ يشبه أرواح الشهداء الذين تغنت بهم القصائد إنشاداً واستذكاراً فيه من طقوس الوفاء ما يستحق التأمل، لا التنظير والرطانة، والإنصات لا المديح الزائف، والإطراء الحق لا التزلف والنفخ. القصائد المنتخبة للنشر هنا تمثل جزءاً مما قرأه الشباب أملاً بنشر المتبقي منها والتي حالت الظروف الفنية دون إظهارها هنا، فهي لا تقل أهمية.
لقد كان للتناسق الفني في القصائد المشاركة كل ما يمنحنا الثقة بأن نقول بصوت عالٍ : إن هؤلاء الشعراء سجلوا الوفاء الوطني والإبداعي لأصدقائهم الذين استشهدوا ولذا كان تشرين قاسمهم المشترك.
وطن للناس
محمد أبو سراج
هتاف ولافته وتابوت
ورفيف ارواح، ثگل بيها العمر والحزن والدخان
ورصاصة ابين صوت وصوت
وريحة موت
ريحة موت.. مابين السمه والماي
القصيده التعبر بوجهين سكته تفوت
ذله تفوت
بين مرايتين الجذب كله يموت
هتاف ولافته وتابوت
بيهم حمّل التابوت
وعبر مابين صوت وصوت
وبيهم صعدن براسه الصور والذكريات وصوت الحديثات
فك زرار روحه وعبر بالتابوت
وابو روح العزيزه التفز من الاخ
وصوت الحرمل المغرب ورشك الماي
ترفه رويحته وتنطفي بكاتم صوت
وريحة موت .. مابين السما والماي
مابين السما والماي القصيده التعبر بوجهين سكته تفوت
تبيعك غفوه عالناطور باول داس
القصيدة متاع للثوار مو تمتوعه للوهواس
نزيزة خوف تاكل بالكراسي البارده من الساس
تشرب رجفة الحراس
تمسح كل رماد الخيم من وجه الوطن وتصيح
كبش هذا الوطن مو نذر لابراهيم
لا هذا الوطن للناس
رعشة قلق بزناد الغشيم تبات بين النيه
والترباس
حرورة نثية من تنجاس
حرورة دم، اذا طاح اعله صوت يفور
والدم لو برد ينداس
الدم راي، الهتاف اليشتعل بالدم
نزر ماينحجي بهداي
الشعار الينكتب بالدم صلف ماينغسل بالماي
نشوة الدم
مشت بعروگ الولايه
المدينه اللبست الدخان نفنوف لعراريس الرصاص العبروا كل الحچي المضموم بالتابوت
وريحة موت
ريحة موت ووطن مشدوه
وطن مشدوه مشرعب للذبح قبله
مسحگ للسرف وكت الظهر ينداس
تلگه گعيدة البستان من اهله
وطن مشدوه
مابي للفخاتي الشاردات من المطر
ختلة
ما يتمشه اصابع في للعيون الجديدة اعله الدمع لو فاضت الكحلة
وانت ياذنب يانشغة الكحله
شما تنزف تظل تحلة
من يتسرسح الدخان مشط ببريسم الگذله
شما يعله الرصاص الحار صدرك عالفشگ يعله
رادوا حرز من دمك يمر لصفة اعله سن الذيب
وانت اول فحل برحي يچوي الملح بالگيعان
وكبل وكته الحچي البارد بصدره يشيب
انت اول شمس تندل منين تسومر القمصان
هوى الثوار
حسين جبار
رماد الحرك بجفوفك
طلاسم خوف
تقراهن بفَي الموت من يعبر صدى الايام
تبجي وينفضح حزنك ضوه للناس
تضحك محد يشوفك شمس تخطف غفل ع الكاس
دموعك أبد مابيهن شبه من عينك الشهله
رماد يندي فوك الياس
يا صورة لخسارة ثورة الفقره
يا غتره يركصها هوى الثوار حد ما تنعكد ع الراس
يا أنتَ،
هتاف تمايزَه السلطان من بعيد
نزع تاجه ورجف بيده وتراواله العرش وهواس
يا خوفك، تكتب ذكرى ع الشرفه تذبلها الشَمس وتموت...
ما همك بقيت بطرك صوت الناس
گسرت المري من ثار بيك الصوت
ما ساومت دجلة بكل نهر ابيض
امس دجلة بوصيتك شابكه التابوت
يا شاعر نزف دَمه لحد ما كتبته الديرة على الياقوت
ولك يا ثار، يا غنوه
كل محراب ما باجي لصلاتك ما اصليله
صلاتك شامه المحراب
بيبان السمه تندهك، وماتندل
ضياعك بين حريتك كمر ويضوي للسرداب
ولك يا ثار،يا غنوه
اجيس اسمي واحس دمك اليجويني
واعرفه اسمي من اشوف الموت بأسراره
واكلك صاحبي، وابچي
وألمحك بآخر جروحي وطن مالاكي ثواره
آخر مهرة من اخر حرب ردت تدور عليك
وصاحت بين ازقتنه
_وين الكايد عناني لگبر (قدوس) ليليه
_وين اليحلم بضحكة (عمر سعدون) ليليه
اليمر بيه عله دجله وينطفي المشع من دموعه
اليرسم بالعراق ويصلب الكمره لون ما گفت شموعه
بجت مهرتك دم وخوف
سكتناها ما سكتت بجتلك بالصهيل نجوم
وج بيها خيالك ثار
وج بيها خيالك دم يغرك الثار
طافت ع الولاية وسيفها مچانك...
لكتك باخر الديره حمامه وجنح متشضي
جنح ما تانه حريته
طار وشايل احلام القفص وياه
ولك يا ثار،يا غنوه
(ولك لا تمسح دموعك رماد الحرك لسه بجفك مشذر)
لسه ابين اصابيعك نهر ميت
ودم وموت وي طاري الوطن يكبر
ولك لا تنرسم لوحة على عيونك يموت اليصفن عليهه
وتنزف شمس ديرتنه
وتلتم فوك خطواتك نواعي تگذل وداعك
ويسكر نهر الولايه ويلم الروج كطره بطارف شراعك
ولك كل الحمام يرف على جروحك وماتبرد
ورغم ثكل الدمع والدم على جفونك
رهم فوكاهن المرود
يا في فوك عش الناس
طش مايك بديك وموت هاي النار ما تخمد
لون الخبز
حسين سليم
بلمرايه شفت وجهي
لكيت الحرب كلها ابعيني من خلصت
لكيت الدم على ارموشي شراع اسود
لكيت الجثث كلها انه
سمعت اسمي بلمرايه لجن مكتول
ولكيت امي تخط بخدودها احدود الوطن بالدم
شفت طير السلام احمر
شفت لون الخبز احمر
ذيج الليلة كلشي احمر
لكيتك ذاك انت التنرفع وطيح ينز منك حلم احمر
بلمرايه شفت غيمه ....
حمره من الجثث ردت
شفت كلبي ينز منه جنح عصفور
بلمرايه النحر مبتور
غرتني الحرب والناس
دخل راسي بلمرايه يضوي على الجثث بلور
ذيج الليلة غرني الموت
ذبحت اسمي ومتت ابيض
بالغرفة سكت كلبي لجن يركض
مشيت وراسي بهدومي !
لكيت الافتة على الباب
بيها اسمي لجن مكسور
لكيت اعيوني حلمانه تفل اجناحها وفوك البيوت ادور
بجيت وتاهت من المستحه اظنوني
وحيد وباوعت بالناس . صغر عمري على اعيوني
مشيت ابلا وعي مذبوح شخبطت المري والناس
بعد مامش مري تنباس
فك حزنك يكلبي وموت.
اكسر بالمري وجهك بعد ما ضل صدك ينجاس
يا كلبي الحزن بالناس
تطفى من الخجل بالدم
تهيم وترسم الدنيا على اجفوفك نبي ابلا راس
تسافر والسجج وحشة
تهد الطير البكلبك يرد من الحرب مذبوح
لون القوس
مصطفى الزبيدي
بهتت واشتهيت ابجيلك عيوني
وكلتلك لزعل جم باب اذا ماصاحب عيوني !!
انه مجرى بنهر عمري وتبدى وضيعت لوني.
واجيت احجيلك بكلبي
اجيت احجيلك اعلى الليل
حزن ناسك يجمل الليل
حزن ناسك يمد روحه ضحيه من اول التكوين لاخر جيل.
حزن ناسك مهد ثورة اعلى كل كمره تلم اجفوفها الشكره وضواها مضيع الديره
حزن ناسك قصيدة انكتبت بليره
قصيدة اترجف السلطان وتغير تعابيره
يمن هاكد حزن ياذيك وبعدك تلمع بليلك
عليمن تشتهي النجمه تغنيلك ؟!
وعليمن ذنبك متونك اذا ماراضيه اتشيلك ؟!
بقبلتك صله جم ذباح
وريحة دمك الباهت عمت ناسك
بجت ناسك
او بان الشوك من عدها شمس عمية وتصليلك
شمس ما عاكبت روحك
خافت من ندى روحك يفز والكاع صبيره
وضماها امشرعب اجفوفه اعلى كل شباج يوميلك
طحت والناس توميلك
او كلتلك للعتب سجه
كلتلي مكاود اكضيها
او كلتلك للحزن سجه
كلتلي الناس مضمومه بمعانيها
او كلتلي اليشتهي عيونك يغليها
اوكلتلي او كتلك وضعنه نزف للخوف
اشتهيت ابجي وصحت بيه
مانام بسمه عيونك حلم وردي
شجاك اشوف شمس الله بظهاري الخوف ورديه!!
ولك بيه اعلى بيبان العتب نيشان فكهن واطلع البيه
فكهن للنزف جرحه اعلى كد كاعه
فكهن لشرى بروحه ضمير الناس من باعه
لليهاجر
لليسافر
الياخذ شمه من اتراب
وسمل من شيلة امه اصيرله امتاعه
فكهن واطلع البيه
شفكهن والحجي بلا ساس
مهي السان الشموع النار فوك الراس
من تعطش الكاع انخاف
تشرب بالمطر والناس
تشرب كل عزيز ايطيح من الناس.
فكهن واطلع البيه
شفكهن والحلم ماباكنه بسكته
مرات العتب بيبان لسكته.
مرات العتب انت
مرات الوجع انت
مرات البجي اعلى الناس ذلة وناس
وطن باكو تضاريسك
اوباعوك اعلى قبلة وكاس
جذابين من مالت الدنيا وعبرو الوهواس
ضموك وطلعت انت
قوس اعلى السما الفضي.
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة