أحتويك ..
أحتويك وأفرش سنيني إلك
علّ وعسى تغفة
أمد جناح عمري وية كل خطوة
چملني بعد من عطر طاريك
وازرعني على جنون الوكت سعفة
أمشي وياك طول بطول
چلمة بچلمة ما املّن
واظل بنفس واهس روحي الترفة
هاك الروح ..
هاك الحيل..
هاك عيوني من مدة ولاشافت طعم للنوم .. ماتغفة!
تسأل عن كُبر گلبي
والسنين الما گظت وياك
ماحلمت بيوم بغصن عالشفة
واگلك ياغلاة الروح ماشفت الفرح
ماعرف كلبي النور
جنت انتظرك تمرني واعذرك
وادعي .. كلمن عبد ظرفه
واتاني والوكت يمشي
اتاني والعمر سبحة
سبحة انفرطت بايدك
يانهر الورد متكلي شوكت ..
يعكد عسل حرفي وي مر حرفه
وبعدني وياك اتاني
هالبت ألمّ الراح من عمري واكظ جرفه
هلبت من تمر فد يوم
تنسى الوكت تتشلبه على روحي
وأحس بسوالفك لهفة
وأظل أهمس للنهر بإذنه
عساك تشوف روح الروح وتكله
أمس چانت هنا سمره
تفيض بكل محبة وشوگ تسأل
يمتة الكاك يا فيّي .. يمتة للهوة تنصفه
