جوري
ثقافة شعبية
2019/03/26
![...](/uploads/posts/alsabaah-9256.jpg)
+A
-A
قاسم الخيكاني
الى اصغر شهيدة في حادثة العبارة
دير عينك يلّي اقرب ليّه من حبل الوريد
شيلني بنعناع چفّك
وامسح الدّم من حجلتي وردني يمّك من جديد
خذني يمّك .. حيل عطشانه على گربك
(جوري) عطشانه لحنانك موش عطشانه على ماي
ذبلت اغصان البراءة وانطفت عين الطفوله
وما لگيت لجيتي راي
ولا لگيت بريسم يناغيني حضنه
وشدني بزنودة حرز
طحت ليهم طيحت اشفاف الندى لخد التراب
المالگاله ... ورد ولملگاه يفز
يابسين گلوبهم ديرة صلايب وآنه بگليبي مسيح
وين يا فيّ اليلمني وتنملي الروح بخضاره
وبأول الخطوة استريح
آه منهم .. سدّوا بوجهي شبابيچ الحياة
وانه منذوره چنت الهم شمس
وجايبة عيوني نجمتين الصبحهم
وكل سواجيهم الميته حنطتها بعطر جوري
وصايغة زلوفي تسابيح ودعاء تكفر ذنوب الامس
آه منهم ..
خضرت ببيوتهم زيج وحرير وگذلة حديثه بصباها
جيتهم لهفة حبيبه
وحلم عاجر
وشوگ حنّه انداف بدموع الگصيبه
الترجه باچر
جيتهم وبحضني مشتعله القصايد
ترسم الجنح الفخاتي درب ازرگ يلمع بديرة سماهن
وشايله اعله زنودي فيض من الگماري
يترس چفوفي معاضد
يا خبثهم ...
راودوا شفة السعادة ... بفرح باهت
ويا ضحكهم ...
ضحك فصليّه بعرسها ... ضحك بارد
شنهو ذنبي ..؟ آنه يا ربي شجنيت
حرگة الليش أكتلتني
ليش مو عيديتي ضحكة
ومني باگو نهد امي ليش چا المن اعايد
ليش فطموني اعله فرگة
ليش حصدوها دمع حنطة وجنتي
ولبّسوا كل شجره بالبستان حزني
حيل زعلانه البلابل من خذوا للطين لوني
ويتموا حتى لعبتي
مالگوا شهگة مراجيح بنفس ريتي
ما لگوا كاروك يتوضّه بضحكتي
يا سواد أوجوهم .. والفشلة خزّامة ابگصصهم
عارهم وصخ الگاع ويبّس الدنيا بخجلها
واستحت حتى الشياطين بفعلهم
كافي ما بسهم المثلي .. ؟
كافي بس (عبدالله) بالطف وفّه عن اللي ملثنه
لسّه مخنوگ بنبلته
وصار نحره الكل نهر خاين گناطر
ونطش على جروحنه سفرة هلاهل
حتى ما يعطش المثلي
وباچر أبجية الضّوه يفرع مناير