يانهر
![...](/uploads/posts/alsabaah-9258.jpg)
يا نهر ياما خذت منه حبايب / يا نهر يا ما خذت منه صواحب / يا نهر بالماي ولدي / غركوا بمايك هذاك وراحت بعيد المراكب / خمسه راحوا من هذاك البيت خمسه / بين موج وبين حيتان الحقد والروح لسه / من هذاك الماي يطلع كل طفل غركان تحلم / اشتعل واضوي اعلى دربه / ساعة الغالي يردلي ومن ادين الموت يسلم / لو يرد ليه ويعود / اعلك شموع اعلى خشبه / واترس الشاطي ضفاير من ورود / يانهر تدري الهجر بسكوت صعبه / يا نهر بهداي هونك / يا نهر تدري بحبيبي من الورد والياس انعم / يا نهر انت عجيب / انت عالم من مخاوف من امان / انت عالم من سوالف من حنان / انت قسوة مغلفه بعنوان طيب / انت ساعات الامل كلش ودود / انت ساعات التثور تصير من كل الزمان القاسي اشأم / انت الك كل يوم لعبه / وانه احزن لو شفت مايك كئيب / وانه افرح لو شفت موجك تبسم / وانه انطر من زمان / هلبت تعود الاحبه / هلبت تعود الليالي والهوه بكل راس نسم / هلبت الحزنان يفرح / هلبت المنسي بهذاك الماي يطفح / هلبت الشمل التبدد من جديد النوب يلتم / يا نهر دنياي غربه / كافي يوميه مصايب / كافي كل ساعه عزه وكل حين مآتم / يا نهر امرك مريب / انت ماي تنث ترافه شلون جا تصبح جهنم / يا بريء بثوب ذيب / نص يكت شوك وسواليف ومحبه / نص اذا كشر حقد هيهات يرحم / يا نهر كلك تناقض هاكثر طبعك غريب / انه اكرهك جي خذت مني الاحبهم / وانه احبك لن عطرهم بيك اشتم.