*رسالة من فتاة عراقية مسلوبة الارادة

أنه بنية فقيرة وحيل مظلومة..

بحبال العشاير واهلي معدومة..

شنو ذنبي أنسجن وردة وره الحيطان

حتى من الگمر يا ناس محرومة..

عار البنت لازم تنستر بالبيت

كل لحظة أموت بكلمة مسمومة.. 

يلومني أذا أضحك بوجه الريح

ويخنوگني إذا يدرون دمعي يطيح

ويكتلوني إذا يدرون گلبي يصيح

ما أريد أنغصب وأتزوج من إنسان

ما أحبة ولا أعرف شنو رسومة..

وإذا واحد غصبني وأخذ عفتي بليل

لأن رجال محد يگدر يلومة....

بطلوني الدراسة بعمر عشر سنين

وگعدت بغرفتي وأحلامي مهدومة..

مستقبلچ بيتچ أگعدي يا تعليم

سكت وبالگلب جم صرخة مضمومة..

وحجبوني غصب خافوا عيون الناس

أريد أفتح گذلتي طيور مظلومة.

وگبعوني لأن طول البنية شراع

أخاف أخطف ذنب عل الصايم بيومة..

وخلوني افكر بالشرف ليضيع

وآني من اللعب هستوني مفطومة..

ودفنوني گمر جوة الليالي السود

واذا مات الگمر تتطشر نجومة.. 

وصح أنتم بشر باللبس مستورين

بس هو عقلكم نازع هدومة..

مرات أريد احچي وأسكت من الخوف 

خلوني أعيش بنية مكسورة..

ومو بس سلبوني أحلامي والدمعات

ولا خلوني دمعة بغرفة مشمورة.. 

أخذوا حتى روحي وفطرة النسوان

لا أگدر أحب لا أصير مغرورة..