إدنه يمي
وما اجيسك
انه خايف لونك بجفي ايتبده
وتنثلم جنحان روحك
ادنه يمي ...
ولايغرك....
كل ضحكهم
لا يغرك.......
كل وردهم
بيلسان الغربه موحش
وانه بستان السوالف
ادنه يمي......
وخل ثلج روحي ايشذر
وانكت اللهفه اعله جيدك
ياحبيبي......
الليل تَوّه
ونجمة المصباح فركه
ياحبيبي ....
التكبر بروحه السوالف
تعطش اجروحه اعله ملكَه
لاتهزني وخلني يمك
تدري فيّْ روحي ايتكسر
لو تموت بغصني وركه
ولا تواعدني اعله باجر
الطايح .....
بوكته شغلاته
الطايح ....
بوكته شحلاته
وانه خايف ....
فيض جنحك
يترس جفوف الشماته
وانه خايف ....
لون روحك
يذبل وين ما حط مشتهاته
وياغلاته...
المايخف جدمه اعله نيته
وياحلاته ....
الماتبده وضاع صيته
إدنه يمي .....
ولا تبعثر لون وجهك
واجزي خوفك من تحبني
منين تلكه ....
النيته ترفه
اليرفض الورده .....
التحد راي الفراشه
منين تلكه ....؟
الصاغ دمعه......
بكل اصابيعه لمن تكَبل محابس
يمي كتلك.....
ادنه حتى نعيش دنيه
بيهه ....
ريعان الدفو يتبده سكته
بيهه....
بربين الاصابع يدبي سكته
بيهه.....
نفسك من ينث يتشضه سكته
وينته انته
انته ذاكه
الخضرت بجفوفي كَمره ...
وانته ذاكه ....
الوين ما جدمك تحطهه
تموت صحره.....
بروحي ...
شايل كل ضوه الله....
وانته ماي .....
و بالملاكه تموت
كسره
