علي الشباني 

دكيت باب السنه .. لن الدهر حاير 

لن الفرح ساجيه ..ومكسور طاري الماي 

شالت العتبه عشب روحي،ومشت للماي

والماي حيل الشجر،

والنبع حيل الماي 

والفرح مابي طعم لومايصل بهداي 

بهدي ممشه المهر ..كبل المطر بهداي 

لكيتك تارس الماي .. الحنين اليصعد ابروحي ..

ويطك ابكل مسامات الوطن 

دكيت باب الوطن 

لن الدفاتر خبز 

لن الحزن مطبعه .. ومكسور طاري الضوه 

ولنك فرح هاكثر ..يوم النسافر سوه 

وياك روحي شمس،..تمشي بشواطي الزمن 

دكيت باب الزمن 

لنك بخت مشتعل ويطوف بيك الوطن