فيان البغدادي
سالفة
وما سولفتها
وبير روحي اتعلگت بي مشنقة إعدام
لسنين الدلو الروّاك سرّي
ماي عيني وياك خضّر
طين حرّي
بكل زويّة ليل من نحچي بعشگنه
چانت
الحيطان تدري
يلمشيت بلا درب
دلّاني بيك
ويالخذيت وياك كلشي
ردلي عمري
ردلي ذاك الليل
والچرچف الوردي
الباقي بيه عطرك وعطري
رد صورّي
ولا ترد
خلّيك بعيون السفر
دمعه اعله خـد الطيف تجري
آنا من اشتاگلك
ارسم على البيبان چفّك
صوت دگه
عيون وكحه
وضحكه سكته
او وجه خمري
واركض وبيّه سوادين الطفوله
واشبگ المامش بديّه
وتشبگ الدنيه عليه
وانت تدري
شنهو چان وياك عذري
