جنه وجنت
ثقافة شعبية
2020/01/28
![...](/uploads/posts/alsabaah-29233.jpg)
+A
-A
عباس صحن العابدي
يفلان يالجنه وجنت ...
كلي شجاك تبدلت ...
داريتك بكيظ وشته ,
وعمري الك بارخص ثمن خايب بعت !
جا حسبت جا فكرت ...
جا كلت رباني طفل ,
ايصير انكره من اكبرت ,
بهداي يا ولف الجهل ...
بهداي جم مره ازعلت ,
بهداي يمضيع العرف ...
بهداي يل بيه خنت ,
ياحيف دمعات الامس وسنين بيهن ساهرت !
يا حيف مشيات الدرب ...
يا ما سوالف سولفت ...
اهنا يمن جنه وجنت !
بكلبي خيالك بات ...
يالكلك غوه وطبعـــــك طبع وردات,
يالعشت العمر وياي بالحيلات ...
يالمامش وفه بطبعك ولا عندك محنه وذات ..
يالغشك كلام الناس ولا هزك تعبنه الفات ...
اريد اجوي الكلب وانسه ...
ولو هم بيه ثلث جويات !
بلكي اعيوني تنسه مغازل الحلوين والحلوات ,
دلليتك يلي حبك ديرتي وبيهه طفت ..
اهنا يمن جنه وجنت!
شكد مشينه شكد سوالف سولفينه ....
شكد ضحكنه وتالي بكلمة دغش احنه انتهينه,
مر علينه ...
وشوف جويات شكثر صارت بدينه ...
يلي من عدنه ايست اشتظن منك ايسينه ؟
اهواي دارينه سنابل بس تبن منهه حوينه ...
اهواي غازلنه شفايف ...
مثل شفتك ما لكينه ,
رد علينه ...
وخلي اشوفك جرح كلبي اشوكح عينه ...
جنت اظن كلبك وكلبي اثنينهن من فرد طينه ...
وجنت اظن عندك دوانه ,
شما يخزن جرح بينه ...
مادريت بكلمه تنغش ...
يلي ما هزك حزن كلبي وحنينه ,
ليش عيني يا حبيبي عني جافيت ورحت ...
اهنا يمن جنه وجنت !!!
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة