في كل عام نجدد الولاء للإمام الحسين (ع) وأجمل ما في هذه المناسبة توزيع النذور وطبخ الطعام الطيب اللذيذ، ومهما تكاثرت القدور يكفي لجميع الواقفين، وكأن يد الحسين (ع) تمتد إليه وتمنحه البركات.
اهو كل عام عاشورك نجدد يوم تخليده/ واجب يا مصابك كل زمن يحسين تجديده/
من دونك غرب اهل الوفه تعاني/ من غربة الليالي ادورنه الغربة/ مو من جوع نوكف بالسره نتاني/
بس زادك لذيذ هواي ونحبه/ يرهم للفلح والفقره والعرسان والعمال/
يرهم للسجين الشاف بيام الحبس تجويع/ تاكل من سفرتك هاي نسوان وزلم واطفال/ يخلص من وكت يخلص تره التوزيع/ لكن ايد تمتد للجدر بسكوت وتزيده/ واحنه شما يمرنه الداي ويزيد القهر والهم/ نصوغ منن الشعر هوسات/
نوج شموع ونودي الضريحك من بعد بوسات/ والعاشك يريد يشوف من يهواه/ ويريد الشمل بعد الهجر يلتم/
ما يكفي تره الاحساس وحده بلا طبع لمسات/
لا ايدك تلامس عتبته الغضه/ ولا روحك تحس بشوفته البضه/ ولا صدرك يفك من جوه ذاك الباب تنهيده.
قطرة ماء
إنه الظمأ الذي ما فارق الأرواح، والعطاشى تبحث عن قطرة ماء لإطفاء الغليل، ولكنَّ الإمام العباس (ع) مقطع الكفوف، والمشرعة بعيدة عن القاصدين إليها.
غربه الدنيه مابيهاش كل راحه/ صحره الدنيه ما بيهاش قداحه/ فوضى الدنيه ما بيهاش كل هيده/ ولا بيهه درب مفتوح لليحلم/ ولا بيهه الجرح ما طاب عطابه/ ولا بيهه الجرح ما طاب فد بلسم/ بس السيف زنجر من كثر ما نام بكرابه/ ولا فارس شهر سيفه وتعنانه/ ولا سوح الخطف بيهه بزمان الخوف مهر ادهم/ جدب كل الليالي وما تصح شجره/ ولا من فوك طاحت بالحلك ثمره/ ولا بعد الركض محصول لو مغنم/ تلوب اطفالنه الحلوين عطشانه/ ترضع بالينابيع الطمرهه الموت بالساحه/ من كثر العطش والداي تشرب سم/ عطش والمشرعه بعيده/ وابو فاضل شهيد تخضب بكطرات شريانه/ طريح اعلى النهر وهناك جف ايده/ مضروب بعمود الراس/ والطعنات ما تنعد هذيج هواي البصدره/ والطعنات مدري شكد هذيج هواي البجيده/ فوك الكاع ممدود الكمر عباس/ وشلون الضوه لو طاح يتلملم/ صلاة الناس دون الماي ما ترهم/ وبدمك يريد الماي يتوضه/ من شايف كمر بالماي يتشظه/ يلم روحه ويرد بين النجم يلتم/ ويرد للمناره هلالهه الضاوي على الرمله/ والمحزون يلكه بنص هذاك الطف فجر عيده.
تاريخ ناصع
محفوظ ذلك التاريخ الناصع بالقلوب، هو في الضمائر بهيئة فراشات تطير، وحدائق يفوح منها الموقف الانساني العظيم، بيد أنَّ الأرض تبكي دماً لأنها هادنت القاتلين.
تاريخك ابد ما ضاع/ مرسوم بدفاترنه فراشات وحدايق ياس/ مرسوم بدفاترنه ورد جوري وشجر نعناع/ وكتاب المحبه شما تمزك ياوفي نعيده/ اذا شحت علينه اقلام وانكسرت محابرنه/ نكص شريان ونخطلك شعر بالدم/ ونسوي الجلد قرطاس/ نجمع كل ذهب كل ماس/ ونفضض عبارات الكلتهه بليلة العاشر/ والدفتر هذاك نعيد تجليده/ مدري شلون ما فزعت تحارب بالسيوف الكاع/ وتطر الشمر نصين/ وتحط الرمح بالعين/ وتحز راسه ووريده/ مو غربه هذوله الذبحوا العتره/ نص بيهم خوال ونص نسب بيهم يرد للعم/ والخانوك بيهم من زمن جدك عرك دساس/ ما كدروا يكتمون الحقد والثار والوسواس/ كلمن يلدغ من ابعيد عربيده/ عليك انت الطبيعه هواي حزنانه/ شفت شعر الشمس مليان بالشيبات/ وامواج البحر تنحب على الصخره/ والبلبل كتل روحه ولا وكت الفجر يقره/ ترس كل المزارع هاي بنياحه/ وخدود الكواكب بيهه تجعيده/ عليك ينوح يامولاي/ من ذاك الزمن لليوم صوت الناي/ صوفر من كثر ماجان مستاحش هذاك الماي/ والقداح ذابل لن طري وحساس/ والقنديل ينزف نور/ ساهر مشتعل كد ما يفيض احساس/ والفارس ابو الكلفات كل العالم تريده.
