سونغ ماي
ثقافة شعبية
2021/03/29
![...](/uploads/posts/alsabaah-71769.jpg)
+A
-A
في ١٧ آذار تحولت قرية سونغ ماي الفيتنامية
إلى مقبرة لمئات البشر بفعل الحرب.
مثل كل ليله
يطفه الشارع ابكلبي
وشوفج ع الرصيف ..امزوكه
العريس غايب
اتباركت بأسمه الاسامي
وجهه يضوي ابكل وجه مر ابضمير الليل
خطوه ابلا وكت وابلا مجان
ما تلاكينه ابدرب؟
ذبيت وجهي أو ماعرفتيني
جنت شايل جريده
أو ناسي صوتي ابمهرجان
كربي مني أو جاوبي ابكل اللغات
سونغ ماي
ملح طعم النهد والشفه طين
والكصايب حزنت كل الخناجر
وانته.. دخن ثكل اعيونك
رد الممحي للمكتوب
واعبر ع الوكت فارس طواحين
سونغ ماي
تطلعين امن الرماد المابرد:
عشتار تتغاوه ابحسنهه
وتطلك ابنار المجوس
تطلعين اتزفج الغابات
وانهار العطش.. والغيض
تكبرين ابذاكرة كل القصايد
تمشي بين ايديج الولايات..
عاشت بيج الأسماء
ماتت بيج الأسماء
تعالي..
اريد اتهجه بعيونج مدارات العشك
واتعب..
واذب عمري على اجتافج
اريد اتمره بانهارج سحابة كيظ
ارد طعم العطش للماي
ارد طبع الفرح للغيض
تعالي....
دربج ودربي مسافات الجزر
من تغرك ابماي الخليج
الماعرف حزن الشواطي
دربج ودربي القدس والبرتقال المر
تعالي ..اتفوح منج ريحة البارود
والموت العتك بالكاع
دوري ولملمي روحي
صبر محاره مهجوره
أو مثل خيط الحرير اتعلكي ابجرحي
اريدج راحة المايعثر ابنفسه
اريدج تطلعين امن الرماد
اولايه تكبر ع الفرات
تمشي بين ايديج الولايات..
واترابج سماء.
1972
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة