رضا العبادي
سديت بابي لجيتك
وفتحت عيني لطيفك
ماتلگه ذاك البزعل ليگلك اسف واعتذر
منا وغاد بكيفك
***
تنزل معزتك والصور
تصعد رماد وي الهوه وما يلتم المتبدي
بس مالت الله من اندرت
ماچنك انسان ورحت مثلوم شي من عندي
ادري بعشرتك للغلب
والنهر يعرف بالبلم يمشي بجدام البردي
منا وغاد لوحدك تدخل لگبرك مو سوة
ونلغي الحچيناهن گبل وانه اطب گبري لوحدي
***
حسبالي تعرگ من اجو
بس القهر ما داهرت من ساوموك تبيعني
ومن خلصت الشروة ورحت
دنكت مو ذل بس گلت بلكت يرد يصيحني
***
مرات مو شغلة نعش
بس يا نياشين الرخص تجبرني اجيك ملثم
من عاركتلك والنزف يركض وادثر بالوجع
مو كبرياء بس خفت لا ادمرك دم
***
بحرورتي صواب الطعن
ميزت جرحي الملتقي بسچينك
ومن گتلك الحگ بيّ نفس
خليتني وداويت جرح الگضة عمره يهينك
لو ما دموعي تذلني
چا خليت عيني بعينك
***
مثل الضماد ابيض يجي
ومن يرد دمه بطوله
من خيروني الكبرياء لو ذلتك
گتلهم الحب سولة.
اختنـــگ…!!
