ها نحن اليوم وعبر صفحة هذا العدد نستذكر نتاجات ينابيع شعرنا الاولى، لنسجل اعتزازنا بها من باب الوفاء كتقليد اخلاقي يليق بذلك العطاء العظيم الذي حققته، ان هذا الاحتفاء لا يعني محاولة اقصاء وتهميش التجارب الشعرية الاخرى والجديدة والشابة منها بشكل خاص، طالما نضع صوب اعيننا انصاف الجميع، انها خطوة باتجاه تأسيس هوية طيبة لهذه الصفحة التي تناوب عليها العديد من الزملاء، والى احتفاء آخخر.
* نرگيلة حزن

مظفر النواب

 

إمعمر من الحزن جمرة

وضايع بدخان امس .. والقمچي ملموم بـشليلك!

چن گصيبة شمس تلهث ضبه صفرة!

وضبه كلش ذهب حمرة 

والمعسل طرب فوگـ العگـل يرگـص .. عرس گـمرة!

كل نفس چنك تشم بــغـــداد .. كلها 

ومن ترد النفس چنك عطيت 

ضاع العمر .. صارت رجعتك للوطن چنها غربتك 

حيــــــــل مرة!

كل التريده من الايام تگــعد على دجلة وتبچي وحدك 

على كل شي ... وتبتسملك طفلة

بعده النهر ينگــط من گــصايبهه ... لا يعمي 

هاي بــغــداد التحبهه 

وانت ما طول الفرات و دجلة يجرن 

روح خضـــرة

تنكش النرگيله تلگاها انطفت مثلك 

دخذلك نفس عـالمامش 

و خلي الماي يكركر 

على عناد العمر 

و المــوت الي گـاعد غـاد متغتر بـغترة!

نركيلة حزن 

...................

 

* مالوم 

ذياب كزار (ابو سرحان)

 

بيّه .. بيّه 

اشتدري بيّه؟

بيّه يلشحيت سوله 

لو برد جرحي .. وانه المالوم 

اشك جرحي اعله طوله 

بيّه سوله.. 

وسوله المالوم سوله 

تدري لو هبيت نسمه 

انه أهب اوياك..

ريح

وتدري لو حنيت جلمه

انه اموتن شوك سكته..

وعيب اطيح!

مره وبمستحه گول:

انت حياتي 

ولك مالوم وحياتك 

يا حياتي 

وبيّه سوله 

لو برد جرحي.

أشگ جرحي اعله طوله 

***

گطره ... گطره اتذوب روحي 

اوياك روحي 

وشوگي شوگ الطير للبر 

دمعه دمعه تطفه عيني..

اوياك عيني 

او طيفك اعله ارموشي خنجر 

مره وبمستحه گول:

انت حياتي..

ولك مالوم وحياتك..

يا حياتي 

وبيّه سوله..

لو برد جرحي..

أشگ جرحي اعله طوله

.........

* حوار

طارق ياسين

 

 گتلي هاك.. هاك الابره.. هاك الخيط

شد جرحك

وما مديتلك ايدي وگمت أضحك

أو شفت الحيره بعيونك سؤال..

أكبر امن الابرة..

والخيط، وعقلك ونصحك.

والسكته عذاب وياك

وأخذت ايدك الأخرى وسكنت وياك

ومن بين الدمع گتلك:

لا تحتار بالمرّه

آنه جرحي ابضميري ما تلوحه ابره

ولا يندل عذابه الخيط من برّه.

............

 

* بسكوت 

كاظم الركابي

 

بسكوت..

مثل ضحك الحلم 

بسكوت 

مثل بجي الحلم ...بسكوت 

أحبك..

لا تظل مثلي عشگ بسكوت 

اناطر ع الضوه من ينسد الباب

واخضر ع التراب البي أثر جدمك

واصيحن ياب 

عطاب..

الهوه البسكوت.. عطاب 

لا هو فرح..

لا هو ادموع..

ولا هو اعتاب 

ولك علمني أغنيلك..

حتى لو چانت اغانيك عذاب 

ماني اكيف..

اكيف ع الجرح من چف الاحباب 

ولا يبقى العشك بسكوت 

لا شباچ اله ولا باب.

..............

 

* موحان الغيظ

 علي الشباني

 

شهـﮓ وتلاﮔن الشبـﮕات

جرح... هلهل صهيل الـﮕذله المعرسة بضوه الـﭽيلات

عَت روحه.. وإجت كل نجمة سهرانة..

عتبها إمغامز وحسرات

نِثْ.. نثْ يا نجم واغسل حزن ما ماتْ

وانتَ مسافر ويه الريح

عفيه اشلون عتّكْ موت..

وانتَ الكلمة عيب تطيح

يا مهر السبح بالريح

وبزود الشهامة تحزمه الزومات

عيب تضّيع دربك نبت خزامات

عيب المايل يهزك زرك فالات

يمسافر... ﭽذب غير الغشك بعيونك يلالي

وغضب يضوي.. وكحل لعيونك الثورات

يلمترّب.. على الـﮕصه البخت دِهله..

مريت عله دربي الماي

جرح الهور بـﮕليبك.. خذت شوك الـﮕصب..

والحيف، والزينات

تْشَلبنْ بيرغ الفقره

يلبدمهم نبت صبير للثورة.. بحزنهم تعبت الدنيه

بصبحهم تاهت النيات

واجت روحك.. حزن طيره.. ذبحها العطش.. وإشتاﮔت

شهـﮓ بيها.. ونده ماي السلَف.. كَامت

حـﭽـه وياها: يدنيه الصامتة ويه الضيم

يحزن الوادم، وليل الفرات المالح..

الكلش حلو ومالح

صعد نشمي بذرة الزينات ظل شابح

نهض بيها الشرف.. واندارت الرايات

زغرت عالنذل.. وتندهك ولايات

طُبُ إلها الصبح.. واترسها هلهولات

وانتَ هناك... صمت البيرغ المسبي

تجرحك وحشة الحيطان.. سكته ترد

ياخذ روحك الصبير ويورّدْ

زهه ورد البراري بليل من حسّك فرح ينـﮕط

لو جاس الصبح طولك فرح ينـﮕط

تمر بالنار وتعيّد

تشوف الدنيه عطشانة.. ونده مامش بعد بيها

تشوف الناس ليل الخوف ياخذها ويوديها

يجي بسيفك صهيل الدم

يجي الواهس ذبح خنجر.. حزن من سالف التاريخ يتلملم

يغيظ المات تذبح صرخته الحيطان

يا حزن العراق.. وهيبة الموحان

يمسافر حنين.. وغيظ

يا طيبة برد بالـﮕيظ

موحان..

موحان اليجي بدنيه العطش موحان

يا راوي النخل يثمر.. ويشب الزرع

ومعبر سلف عطشان

وإحنه..

احنه بلا وجه.. امترّب دربنه..

بلا سفر ونموت

تاخذنه الشيم بسكوت

واحنه المستحه التعبان

نتحمّه بضوه الإنسان

والإنسان..

بس اليصهل بدنيه التعب.

.............

 

* صحوة حلم

كريم محمد حمزة 

1 

اكتبلك سوالف بيض 

اتهجس حلم عشناه 

اشگد خيبة حلمنه اتغيض 

اتهجس عذاب الگاع مصلوبه 

المسيح اتراب حلمه ايفيض 

يتنطر علامة سرك المفتوح 

كلمه اتعجز النسيان 

خطوه ابكل مسافه اتلوح 

وجه الله ابمزار ابعيد 

ضاعت لهفة الزوار بدروبه 

ولفت عنده حمامة نوح 

رجع للغمد تاريخ سيف المعركة المجروح 

وافرح من يجيك الموت 

كلشي ايصير الك مسموح 

 

2 

وارينه الحلم يتراب 

گاع الضيعت حدهه 

ورجعنه اشيامر السلطان؟

 

موتوا ؟، انموت   

واللهفه؟ 

ابجبين السيف فوك الذل توسدها 

الشرف ..يلتحفر اعيونك 

شكل ذمة مراجلنه وسگانه امن المصايب سم 

بعد مامش گلب ليفيص كبل العين

شيمه او دم 

بعد مامش .. سكت لحظات.. 

اگعد بالشمس لمن يجيك الفي 

واشرب من خمر شيراز مره وصيح:

يا حي لا تمل الحي 

بعدهم ع النهر كفار..

وانت اتحوف دمعتنه 

وتصاوغ بالدمع والمي 

اهلنه بخير 

من سابع ظهر فرسان 

يطوون السوالف طي 

جدي اللي فتح بالنوم 

گيعان الوره الدنيه 

وعله اعناد الصدگ 

جذبه قصايد عاش 

جدي الخاض بكتابه العتيگ  

ابحور ماتنگاش 

لابد ينتخي ويسمع 

بعيده وشالت امن الگاع 

شيراز العرفناهه 

اشوكت يا حايط العبرات 

تعبر ذلة اعيونك 

زمانك والشمس تندار 

واتعرس رواياهه 

.............

 

* لا تنتظر

عزيز السماوي

 

لا تنتظر

يزي اكبرت

والدنيه صارت موش الك

وراحت مشاحيف العمر تفتر فلك

عيونك اعلى دروب العشگ

غصن الصبر ظل ما يطگ

لا تحتركَـ

يالزارع الآمال بسنين الوهم

اثمر ورد مصبوغ بجروح الندم

شليلك ثمر جذاب ما بي كل طعم

اتأسفت على أيام المضت

مامش بخت

رديت تمشي بلا گلب

وفراكَـ دنيانه تصب

حبك صعب

بيدك مجاذيف الضوه وثگلن اهمومك من زغر

ما ندري دنيانه تظل بس ليل ما بيها فجر

لو طلفح كَليبك صبر

لا تنتظر...

اسمع سواليفي شكثر

جرني النفس للگاع .. وك ما بيّ أجر

بدموعي موتّ الضوه ..والدنيه وحشة

ابلا بدر

مو فاضن اعدول الصبر

مامش فجر

ومشيت سنطة بلا حجي

بطل يدلالي البجي

اتعكز على اوعود الترف

والليل تدريبه كلف

ما ظن يعف

وضلوعي هزهزها البرد

حسبات تاخذني وترد

كَضبة عرد

حصلنه من تالي العشگ گضبه عرد

او ظليت أشد بجروح عمري شگد أشد

ابذاك البرد

شديت كسر البضلع.. ومشيت ودموعي تهل

ومشيت متعني الترف

طلعولي وضلوعي اتخذف!

وشعندك بتالي الليل .. نام النجم نام سهيل

والشوكَـ راح ويه السيل

والخيبة تعصر بالگلب

رديت ماعرف الدرب

وك يا گلب

غفلة الدموع تموت برموش الجفن

ما ندري تالي الشوك بس ذلة وحزن.