أصوات
ثقافة شعبية
2021/06/20
![...](/uploads/posts/alsabaah-82002.jpg)
+A
-A
ذوالفقار يوسف
ما هو الا ذلك الجيل الذي عصب قلبه بالأزمات، وفتح عينيه على اروقة ضجت بالحروب، جيل قد اقتيد بمسيرة الآهات والحسرات، ولان لابد من الصراخ، فتح فاه ليقول، وليغني، وليكتب بما تبقى من قلبه، على وطن وحبيب، موت وحرمان، فانفجرت منه آلاف الحروف التي امتزجت بشجنه العراقي لتخلق القصيدة، انهم اصوات كان لابد من أن تسمع، لتحكي لنا صولات الزمن فينا، ليترجموا المشاعر كما عشناها وسنعيشها، وما كانت مهمتنا الا أن نسمعهم كما الذين من قبلهم.
حاول
علي نافع
حاول لا تنزل دمعة عيونك
اذا گلك الشامت بشر شلونك
من تباوع حمولك ناقصات متون
وتصد تلگه البظهرك بدو يجزونك
من يوشل جليب ربيعتك وطيح
من ما تلگه وادم توگف بعونك
لا تهتم جفوك الهوه يطير خفاف
شراح يروح منك كون يجفونك
الزلم مثل العلگ لو بيد وحده تعيش
لم روحك بروحك من يطشرونك
وعدل لتخلي طبعك صير شص اتصيد
اذا تبنيها عدله اتعب امتونك
اليدور خوش صاحب گله عابس مات
مسلم لا تصير ومحد يخونك
............
انه وفانوسنه
حسين العميدي
انه وفانوسنه نعرف النجم كله
وشكو شي بالكواكب روحي تندله
حبايه السمسم مني فنها تضيع
وانه مضيع ولف بولايه الحله
عمر ليلك طويل ودفتر صغيرون
اكتب مدري الف چان التتن فله
وتذكر قبل من ينطفي الفانوس
نركض عالصور من وجهك نشعله
مو بس الضوه حتى المريض يطيب
اراويه صورتك والعافيه تردله
..................
اسمحيلي
علي حسن علوان
اسمحيلي ارد اگلچ خايبه شلونچ
ذبي الثوب الاسود لا يحسدونچ
تعداد البشر مو سبع مليارات
غلط.. لا سبع مليارات وعيونچ
صعدت حاجبچ يصعد وياها السوگ
تنزل گذلتچ ينزل عله متونچ
طلبتچ لحد ماخلصت العلوگه
الشمس من شافتچ لليوم محروگه
يا مدري شگلچ يا حلاوه بيت
اليفتهمچ يجيچ بلايه خاشوگه
عمي بهيده من تمشين فوك الگاع
تره والله العظيم الناس مسحوگه
يا لخدودچ فلوس الناس ما عدها
شني الدنيا چبيره عيونچ بگدها
صرت انقل امراض الناس مني تخاف
انا بنادم عشگ مو جرجف الردها
چفوفك حاره يگلوله الي يسلمون
ويگلولي مريض وگلت گايدها
...........
شمسك
كرار سعيد
شمسك سومرت گلبي
وصبح لونه مثل وجهي ولا ينحب
وعرفتك باول المشوار مو صاحب طويلة وياي
شص شاريني حتى انذب
بعيون الخلگ لون احمر ومحبوب
بس بعيونك اني الدم
وانه فرحان من شفتك تلملمني
اثاريني شبچ صياد خيري يبين من التم
طلع چذابي يمداراك سلعة بسوگ
حتى انباع متحبني
سهم تسحبني ووصل كون يم صدرك
وباول فرصة تتركني
وارد جايب طريدة وياي
تفرح بالطريدة وانه تكسرني
وما مهتم چنت وياي
واگل الروحي بس هيدي
وانه عكسك چنت كلش حذر وياك
چن كصاب اذا اغلط اگص ايدي
..................
بشوارعنه حزن
سعد شميل
بشوارعنه حزن والجثث ما تنعد
ومثل درب الزيارة الدرب گله اسود
ومن گد ما يخرطن بالخدود نشوف
چم هلال احمر يابس اعلى الخد
وتوابيت الجوامع گضن وهنا صوت
بسكم لا يموت احد
خشب ماكو اليلمكم لا يموت احد
بس هنا شفت مشهد
شفت المات موت الله هله يصيحون
خل انطلع ابونه نخلي الستشهد
هنانه صويحبي استشهد
هنا صوت الاسعاف من الجثث مبحوح
هنانه الدم على النشرات ظل يصعد
ومطرت والمطر ما بلل الزاتوت
الفواتح صارن امظلات يمحمد
المگص ما يمشي بقماش العلم مرتاح
بكثر مافوگه دم الثائر اتجمد
......................
خلصن كل مراسيلي
محمد فرات
خلصن كل مراسيلي واجيت انه
گوه افتح عيوني من التردد ذاك
مثل عيون نعسانة
اذب تعلوم اهلي ابابي واتعناه
زحمه من الكرامه تشوفني هنانه
اجيت وعال سرگيه
يدفعني اعله گبري بدفعة السانه
وانه وگلبي تعبانين
مو مالت ندگ مقفولة بيبانه
گوه اسند بروحي والزم الشباچ
واكتب عالنده بيدي هذاك انه
اعلى كسرة اضفر يواسيك
بوكت كسرت رگبته جنازة خوانه
.....................
لتصدگون
سيف الغزالي
لتصدگون واحد گلكم اتغير
هاي اسنين اباوع جرحي واتذكر
هاي اسنين احاول حبكم اتناساه
واگولن ينمسح باچر واكيد اگدر
اثاري الحب مثل رش العطر عالايد
كلما ينمسح يكثر
المهم عايش وراكم بس عشت منظر
ضوة سيارة اسعاف بمكاني افتر
بس ظليت اتاني المثلي ليش يروح
شيخسر بعد هو اتأخر اتأخر
..................
راجع
حسين صلاح
راجع تعتذر وتريد كلمة تفرحك
مو حلوة جاي انته بصلح
وانتظرك تخلص حچي وتسمع جواب يجرحك
اتمنى اذلك بالحچي
والگاك ناگع بالبچي
واگعد گبالك مبتسم تمسح دموعك واضحك
وكلهم درو بينه البشر
عود انته ابد ما حاچي
بس هي هاي المشكلة
مفضوح وجهه التوه تلگاه باچي
وصح گاعد اگبالك عمر
بس حظي ابد ما گاعد
حتى اغلى من اهلي صرت
بس هسه ما ارجع الك لو تبقى اخر واحد
.....................
سامحني
سجاد الغريب
سامحني غلط جانت مشاعرنا
وگدرنه نطيح
سامحني تره شما تختنگ مجروح
بيك شگم كسر ما تدري وين تصيح
گدرنه نرد غرب وانلم رسايلنه
بصورة تندل منين نگض خواصرنا
تندل وين تلچمنه
شعجب صرنه غرب هيچ واتوادعنه
وگلي شبيك شنهو اليوجعك ولمن رجعت تحب
يمن بيك الحزن سير على عيونك
واذا غربه رجعنه نشب
غلط چانت چفوفي بچفك تچلب
..............
رحت بايگ شمس
علي الشمري
رحت بايگ شمس
شو جايب غروب
انه حايط كهف ما عايز فياي
مثل ماجيت ارجع ما احس بيك
جنت عالراس بس هسه انته جواي
ظل ظليت بذني اصيح لصيح
ما اسمعك لان ما حاسبك جاي
من شفتك بعتني ما عمت عين
رگصت بظهري انته وخنجر عداي
طحت مو دمعه لو عالدمعه مقبول
اقل من يمه فوچ الگاع بهداي
النمل حطني اعلى ظهره واستخف حيل
ما همه الحمل حط واحد وياي
.....................
الموت أهون
حسين علي المطوري
الموت اهون على الينباع
السهم من ما يلوح يموت
يدفن راسه باقرب كاع
يهيبتهم واذا تنباع
هو انت لو خلوك يم الشمس راس براس
انت تبين اللماع
يالمطوري يچنك كاع
الشريف يحبني حد ميموت
عد المو شريف انباع
ما دور على اي شي ضاع
اليوگع مني حصت الغير
السمه متندگ على الغيم
من ينزل مطر عالگاع
ترف تلمسني شعرة ريش
النجمه بعيني چكليته
بس جربني من تثور
من الخيل تسحگ خيل
تلگه الزلمه شخصيته
ابدي من انتهي وماجوز
انا بعينه جرس الانذار
چن فنجان بالمگلوب لو هزيته دگيته
انا الدمه على طوله يلوگ
من فات السهم بحشاي ما كسرته جريته
.....................
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة