طگ گلبي عليك
ثقافة شعبية
2021/07/31
![...](/uploads/posts/alsabaah-86466.jpg)
+A
-A
عبد الحسين الحلفي
طگ گلبي عليك وجيت اشوفك
على بختك تگلي شعندك وجاي
والله حته هل كلمة حلوة منك
واتمنى عليه تعيدهه هواي
لذلك حته انه اسمعهه اكثر
راح ابقه عله بابك رايح وجاي
اشما تصعب علي صدكني ارتاح
اريدنك صعب لا تسهل وياي
يجوز بهاي ايدي الزم سباع
بس تخوني من الزم الماي
على بختك شنو السويته وياك
عفت ناسي وخذيتك عوض ناسي
احبك ما احس اكرهك فد يوم
واذا حسيت هم اكره احساسي
يذكروني بعذابي الشفته وياك
واذكر واگلهم والله ناسي
كلش قاسي وبالذات وياي
واگول وياي بس انته مو قاسي
وگفت انته اعله راسي بجدم سكران
وتريد اطيح ويعدلك راسي
بحبك تختلف حتة القياسات
صفر حبك كسر رقمة القياسي
ومدري شبيه اشمك وانته عاگول
وغيرك ما اشمه وهو قداح
واحس نغزاتك رماح ويه الانفاس
واگول افيش وانه اتنفس ارماح
اذا ما تسمع صياحي الخلل بيك
اليصيح احسن من الما يسمع صياح
واذا انه طحت صدگني ماضوج
الوگفته طولت بالطيحة يرتاح
بس خلي ابالك يا ضوة العين
الاصيل تروح روحة لو محب راح
المرجوحة الاصيلة تگطع حبال
اذا بالعيد من عدهه طفل طاح
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة