سعد صاحب 

بشر القاتل بالقتل، هكذا يقول المثل الشعبي الشهير، وتكشف لنا الرؤى بان كل مجرم سفاك للدماء مبتلى، اما بموت اجمل اطفاله او بذهاب البركة وضياع المال، او يصاب بامراض مستعصية او غياب التوفيق. 

 

هاي يا عيني القصص للناس رادع

لابد يعيش بالم كلمن يخون

لابد يعيش بقهر كلمن يخادع

والنتيجة من الحقد ومن المظالم 

لو طفل عندك حلو كلش يموت 

لو توج النار من كل الجوانب 

لو هذاك المال ينباك وغصب عنك يروح 

لو صواعق تنزل بدارات غاصب 

لو غضب الله يمر دخان اسود

فوك من هاي الشوارع 

فوك من هاي البناية

لو تطيح من العصف كل البيوت 

لو يضيع الجاه منك والامارة

لو يجيك الداي يركض وانت غافل

لو تكضي سنين عمرك بس نطاره

وانت لساعك بعد مغرور جاهل

تاخذ بكل راس صره من الدراهم 

ما تفيدك هاي خسرانه التجارة 

اتعظ من التجارب

اتعظ من العواقب 

وين صاروا شوف اصحاب الجرايم 

 

صياح

كان قاتل الامام العباس (ع) قبل القتل جميلا، وحين اقترف هذه الجريمة الشنعاء، اصبح كريه الوجه منبوذا، يصرخ كل ليلة بما يشاهد من النيران، فتستيقظ الجيران على صياحه المدوي. 

 كطعوا العدوان جفك ما اكولن لا صحيح 

بس صفوا تالي مثل كوم المزابل

وانت عليت بسمانه نجوم وشموس وهلاهل 

صار كل جف يا ابو فاضل مناره

صار كل جف يا ابو فاضل ضريح 

يسال التاريخ قاتل

وجهك اصفر من بعد ما جان ضاوي شكد فليح

كال بجفوفي اذبحت فارس همام 

هم وسيم وهم جسيم وهم نسل وادم عظام

هم اثر ذاك الاصل بالعين شايل

هم تشوفه هواي قاسي وهم مريح

ما شفت مثله مواسي

ما شفت مثله ابد ما بين ناسي

ما شفت مثله مقاتل

ما شفت مثله بطل للموت عادل 

ما شفت مثله صريح 

وانه ما مديت ايدي اعلى الجسد لو ما جبان

وانه ما مديت ايدي اعلى الجسد لو ما وكيح 

كال كل ليله بوسط ذاك الظلام

يدخل البيتي ويفوت ويعتنيني

ما تمر ساعة اذا ما هو يجيني

ياخذ بهاي التلابيب واطيح 

بين حفرة نار وجلاب وخنازير وفحيح

جان ذاك القاتل من الخوف بفراشه يصيح 

كل اهالي الحي يسمعون الصدى الدامي الجريح

من يجن الليل ويصير الظلام 

ما تنام الناس جانت ما تنام 

من كثر صوت النذل ذاك القبيح

 

مهابة

للامام العباس (ع) منزلة كبيرة، عند العراقيين بشكل خاص، والناس في العراق، ربما تضطر الى أن تحلف كذبا في احد المعصومين، لكن لا تفعلها مع الامام العباس (ع)، صاحب الرأس الحار خوفا من الشارة. 

انت صانع للفرح والمستحيل

انت عن خط المجد لا ما تميل

وانت من طين القداسة السوه منهه الرب سلالة انبياء

من بقايا فضلتك للكاع هم نزلت اوادم

واحنه منك هاكثر عباسنه الغالي نتحاشه 

اليشوفك يعتقد انت فراشه 

واليعرفك يفتهم معنى الحنين البيك عارم 

انت حب حسين وحده الجابك الهاي القضية 

مو طمع بالجنة عندك لو اماني 

لا ولا فوك الارض صاحب مغانم

انت من يوم الصرت لليوم عابس 

انت من يوم الصرت لليوم ناقم 

من كثر ما بيك وسط الراس غيره 

من كثر ما بيك احزان وعذابات وفواجع 

من كثر ما بيك ايمان وموالاة وتشايم 

واحنه صدك نحلف بكل الايمه وما نخاف

بس اذا مرات نحلف بيك باطل

ننفضح من شارتك ما النه عاصم

الحبيبة تحلف اليهواهه بيك من الوساوس

واليبوك وبيك يحلف مو صحيح 

تالي لازم ينكشف من دون حارس

واليحبك واليوالي وما يبيعك ينتصر بعدين لازم

وانت تدري عبرت الحد الجسارة

وانت تدري يلوب كل مشتوم ساهر

بس ينام الليل مدري شلون شاتم