الشهيد أقوى حضوراً من السيوف
ثقافة شعبية
2021/08/14
![...](/uploads/posts/alsabaah-88450.jpg)
+A
-A
سعد صاحب
الطاغية يعيش تداعيات انهياراته الاخيرة، رغم درايته بما فعله من الجرائم، لكنه يصر على تلك الاخطاء ولا يتراجع، ويبقى يتأرجح بين الندم والاستكبار، الى أن يموت.
يا نبي اليقبل بعد مني اعتذاري
وانه اعرف ينهمل باجر مزاري
ريحة ذنوب شكثر شايل ازاري
انت وعيالك غرب بين الظعاين
فوگ ذبحك .. فوگ جرحك
فوگ كل الصار بيك من الضغاين
فوگ كل آثام روحي وفوك عاري
فوگ ما بين الثلج طشيت ناري
راح اجيب الناس من كل الاماكن
راح اشرب كاس واضحك
راح اعدم كل شبح مجنون بالضد لو تحرك
راح اصلبك فوگ داري
راح اسوي الدنيه فزعه
والحديد يلين طبعه
وانه گلبي من الحقد ما يوم لان
طاغوت
حاول الطاغوت الانتقام بكل طريقة، وامعانا بالحقد الذي ليس له مثيل، لاسيما حين احرجه الرجل النصراني في النقاش، اخرج يزيد الرأس من المجلس، وصلبه على باب القصر ثلاثة ايام.
راح يا هودج يمر شايل اثاثه
يحترگ هوه وخشب كل المواكب
وانفطر گلبه حزن جامع براثه
واشتعل بالنار راهب
مدري شنهي السر تره بهاي الثلاثة
مدري شنهي السر تره بهاي الطواري
لو مدافن تنهدم تطلع مدافن
طاري كلما ينمحي يطلع جديد النوب طاري
يا ثلث تيام حافر ذيب داسك
وانت ما بين التصيح وما تصيح
يا ثلث تيام نهبوا حتى ماسك
واليمد ايده عليك شگد قبيح
يا ثلث تيام حفروا جوه ساسك
ما لگوا بس الشرف حامي اساسك
ما لگوا بس فكرك الحر الصريح
يا ثلث تيام راسك
وحده ينزف فوگ بيبان الحواري
والنزف واضح ولا يحتاج منكم ترجمان
مهتوكة الحجاب
سمعت هند بنت عمرو زوجة يزيد ذلك، فجاءت اليه وهي حاسرة عن رأسها، حافية القدمين، مهتوكة الحجاب وهي تقول: يا يزيد رأس ابن بنت رسول الله على باب دارنا.
راس مگطوع واهابه
راس مگطوع واخافه
راس مگطوع واجدد دوم صلبه
فوگ اغصان الشجر كل حين افره
فوگ بيبان القصر كل يوم اصلبه
يا يزيد بكل ضمير حسين باقي
ما يموت وهذا راسه يصير مدرج للمراقي
ينولد بينه جديد شما تصلبه
صار للحب والشرف والود مثال
واحنه كل احنه امتثال
حتى لو دمنه غصب باجر تشربه
كل خنازير البراري والذياب
جان موقف هند احسن من بعض ذيج الرجال
تركض تعنت عليه بلا حجاب
يا يزيد شلون تقبل بالاساس
راس ابن بنت النبي فوگ اعلى باب
والالم لا ما يقاس
والمواجع هاي ما الهه قياس
والارض بالناس ترتج من اثر ذاك المصاب
وانت گلش زين تعلم
هذا وكت الموت بسم
هذا زين الناس كلهم
هذا منه يخاف حتى الزبرقان
يوم رهيب
العظيم في ملحمة الطف الخالدة، أن القتيل كان اقوى من السيوف والرماح، واسمى من المنتصرين القتلة، واعلى من الرايات المحتشدة في ذلك اليوم الدموي الرهيب.
يا جهنم نار گلبي ويا لظاهه
يا حزن روحي شمس يحرگ سناهه
هم ثلث تيام جسمك
بالثره المكشوف ظل مطروح عاري
هم ثلث تيام سيفك
ظل يقاتل دون جف ودون رايه ودون ايد
هم ثلث تيام طيفك
ظل يحوم اعلى العيون الصارت بفرگاك رمده
من يمرهه تنام مرتاحه وتهيد
هم ثلث تيام رمحك راح يرثيك ويعارك بالتراب الما يفور
بيد يگلبهه اعلى بيد
يشعل النيران ويشمر على القاتل بواري
والمنايا يگلهه باتي وياي باتي
هاي اول مره اشوف بكل حياتي
القتيل يصير اقوى
القتيل يصير اسمى
القتيل يصير اعلى
لكن القاتل يظل مكسور مخذول الجنان
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة