ناعور الوفه
ثقافة شعبية
2021/10/17
![...](/uploads/posts/alsabaah-95912.jpg)
+A
-A
وسام ناجي
فشله تندهني وافزلك والگه طيفك موجريب
الناس تنشدني وادنّك
ليش ماعندك حبيب؟
وانت ماخذني نذر لوّل ضريح مصادفك
وانه كل هذا الجفه وما عايفك
لهسه ادوّر كل حرف باسمي احترك بشفايفك
بيش تندل؟
وانه گمرة كل حزن طاف اعله ليلك
ليش تذبل؟
وانه ناعور الوفه ونهر الضوى التارس شليلك
وين دربك؟
كلشي مسدود بغيابك وارد اجيلك
كلشي ينشدني عليك وگلبي ضامي لسلسبيلك
يا وجه
ما يلتفتلي
وياعشگ ماخذني سَفره لمدري وين
وياحرز روحي امنشدگ عله ضنوني
اتشوغ كل ليله غريبه بخاطري
ويشتعل بيّه الحنين
من الطواري العابره اشتاگيت لاسمك واشتهيتك
واعتلگ بيّه الضمير ولملمت حيلي بوصيتك
ياهو گلك عايفك لحظة مسامر لو نسيتك
وانه منكد ماعطشتك من ورى الدنيا ارتويتك
صوغني لكل الگلايد رگبه سمره
صوغني لكل المناير ليله گمره
صوغني بكيفك مواسم واشعل بعمري ربيعك
واشتريني اليشتري الذمه التشبگكك ما يبيعك
واچوي ظلي بجم شمس واطغى بسمومك
ما اذب لوني عليك وما الومك
ما ادليك اعله سالفتي الطويله اليمها يگصر كل وداعك
الشوف مده اعله السمه وهيه سماك
وكل شبر بالكاع كاعك
انه اعرفك تستحي وماتسد بابك
والله ياخذني اعله طولك
لو تبديت بوداعك!
لا تبديني بوداعك!!
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة