آنه وصورتك
ثقافة شعبية
2021/10/24
![...](/uploads/posts/alsabaah-96660.jpg)
+A
-A
زياد البصراوي
آنه وصورتك والكاس
ووجهك چان رابعنه
أشتهيتك تسكت بروحي
حچي البلصور مابي صوت بي معنى
جاي أسمع ونين بهوسة جروحي
أشيطفي الدنيا اريد ارتاح من روحي
شنو ذنبي غريب وديرتي احساسي
وشنو ذنبي انخلقت لناس مو ناسي
وشنو ذنبي اديرن غيركم بالكاس وصوركم تصعد براسي
ماعندي الينسيني وأگول تهون عشرتكم
واگول انسى ...شينسيني وبعدهي تدردم براسي سوالفكم
واگول ارتاح وانه الفاتحه تبين عرس يمي
أمنهد ما فارگت بليل ضحكتكم
تركتوني وشنو الغايه ليش الي ضميره انسان ما ينذكر بحچاية
وانه امنرد ابيع الشوف اتوضه بضوه اليمشون واتوكل علمراية
اريد ارتاح
ياطير اليبيع جناح
هاي الناس خلتني ادور بلسمه ولاية
واطيرلكم عطر مبيوع شابع شم
وامرلكم هلا الگيعان لو شافت فلح تلتم
واخاف وجوه هاي الناس تخنگني
اجيكم بالهوه محزم
وانه مابيه لثگة ليل
اخاف انباك.... هذاك انه ضوه ملثم
هذاك انه انوخذ لوني
من تغيب الشمس للسما يسافر دم
تمنيتكم ...
يلا الاصبع يتمنى كل الناس ما تندم
ضعت بوجوه وادم ما تعرف تشوف
اريدن عين تلگاني
واريدن صوت يخدر من يگول اسمي
واريدن اخ تنساني
مشه عمري بتواليه وانه متاني
صفنتلها وشفت الفراگ تاليته عشگ ثاني
صغرتوا بعيني وتمنيتكم يمي
مرات الوطن خيمه
وادم كلمن وضيمه
چنت كگطرة واجت شمس الله باستني وصرت غيمة
اريد انسه وهواكم يعبر بروحي ويذكرني
وضواكم ينچفي براسي ويكبرني
اشتهيت ابچي واشم ريحتكم من بعيد وارسمكم
اثاري العطر هم يحچي
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة