محمد صاحب الفتلاوي
مامشتهي فراكك دمع بي شبعان
مامتوازي خلي دموعي دم تهمل
على عافيتي خايف موعليك تروح
جبت دمعي بشليلي وجيتك اتوسل
لا خر شبيه ردتك مشط موفلاح
تشتله وحضرتك بيه تتغزل
العوج من تعدله يموت مويرتاح
تكسر ظهره من تعدل المنجل
مثل خيط السمه تتلولح بممشاك
ولامره صحيت وجيتني معدل
مثل هدت اغم تطرب على الحاجوز
من هدلك شوك شوكك مايهد يجفل
خاوي بعشرتك صرت ارفع من الخيط
بايد ماتلفني انكطع بالمغزل
فصلية جتل بركعي مبلل ماي
ونعى بطور فدعه ودمعتي تهلهل
