علي الصفار
أمس آخر لليل
مات
أمس دورت الصور بس مالمض للونك
أبوجهي ونطفيت
أمس دورت الرسايل
والشبابيج وصفنتي
وما لكيتك ونطفيت
ياهو اللي ياخذك صدفة
ونوايا الناس سوله ضوگ
وين تريد بعيونك الما شبكت
أوجوه تلوك
الأغاني منين البروحك
عمر محروگ
آخ تاخذ أخ مدري ليا ونين
ولا صبح يصدگ
وشوفك
شوفي سكتة وبيه هوسة
من الحنين
وأنت يا آخر ضوة يلوح السنين
لو نهر يعثر بروحي
جا جره بكل طولي اسمك
لو أصابيعي ضوة جاشفت خصرك
لمني من الدروب الكاك
اليدور باب للحب ينتظر موعد أجروحه
الما يشم بالناس حزنه يغني روحه
منين ألمك طاري ما بردان صوته
وإنت كل حر مشى بروحي مشتهيك
والشموس النشفت بلا حس
ضواها يشتهيك
كل كمره الجستها أخيال أصابيعي اشتهت
طولك مسافات العيون البيك
تشربني
ولمك باب من غبشة تبللها بشمس
وتفوت
وتبدأ بضحكتك لوم ولم حزني اليطيح بعيد
وجوي الليل وأشوفك تجري بآخر نوم
كلّي بيا حلم أعبر وأطيح مبلل بليلك
ولم خصرك من الجرجف وكل للشوف شد حيلك
حرت يا شفه أغنيلك
ومد جفي اعله يانيه وتراجيك الخدرانة
حزنها أزلوف
جا ليش أشتعل بالشوف
تدري بشوگي فايض وإنت حضن أجروف
ياخذني ضواك وينكطع غفلة
وأرد للحلم وتنخاك ما تلتم بأول شوف
يل رفة كحل طولك لم روحك
ولوح آخر ضوة بالعين ما تلكاني بعيوني
يل تتلوح بكل ليل يمتى أطيح
صحتلك جم شمس مشطت آخر نوم
وأنت ولا حضن فزيت
ليش كبال وجهك تركص عيوني
وصير من الخدر جرفين
أليمته اتنه هواك يطيح
حتى أسكر بشهكة تين
