كاظم لاله

كل خطوه وراها خيال.

بس انت...

خطوتك تحمل خيالين..

يشابچ بالخيال خيال..

وينبع بيهن خيالين..

خطوتك..

والسمة.

والگاع.

والظلمة.

وضواك انت..

رسمنك..

رسمنّك خيال تطشر إعله الگاع.

ورسمنّك...

نهر تتراجع جروفه..لينابيعه..

شرف للنهر..من يرتد..

على جروفه لينابيعه..

لچن ذلته النهر..لومات..

مدفون بينابيعه..

حلاة الچف..

مو زنده..يضوي إعليه..

حلاة الچف...

مرسومة بصابيعه.

...........

ارتفع گلبك مسلة..

عليه خطت شرايعها..

حفظها...

لاچن بنادم..

نساها ونساك.

ولا گال..

حزنك خوف..

حزنك خوف..

حزنك مو بچي ودموع

فرحك شوف..

للسچة الوسيعة..الضاگت..

بگد ما...طفت بيها..

وجرحها شموع..

تقرانه الليالي..سيوف عطشانة

وتكتبنه الحروف جروح...

سكتة.لاحس.لانفس.نموت.

لچن...

طبع النهر بينه..

...

ياحلم الناس.

ياحزن الناس.

يا خوف الناس.

باعونه بخشب..

ياچف يدگ الباب.

شفت وجه السفر..

شباچ...

ودموع.او وجه غيّاب..

وشفت..

كل حرف بكتابك..

يوج ويرد يطفه..

ومن يطفه...

أرد...

وانكتب..بدمي شعر..

بكتابك جديد.

ولو آنه بعيد...

أظن آنه غريب هنا...

وأظن انت غريب هناك..

وأظن حتى التواريخ العتيگة...

تچذب..بگدما..

چذبت إعلينه.التواريخ الجديدة..

وأظن من روه(المختار) سيفه..

موش لجل حسين..

بالدم إرتوه سيفه...

ولا شافت...

على الگصة.النبوّة تلوح..

من درّت ثداياها..

للما.روت شفافه بثداياها..

يلن طبع الثدايا تدر.

ويلن طبع الجروف..

ويا النهر تبحر..

وأنه...

أنه انت الغريب..

الردت گلبك..

يورجني ويخبرني..

الغريب..اليا وجه يبحر...؟!؟!؟!