أغاني الدرويش
ثقافة شعبية
2019/02/08
![...](/uploads/posts/alsabaah-5313.jpg)
+A
-A
عزيز السماوي
أريدك...
أريدك كمره تضوي الروح..
وتحدر مشاحيف الحلم بالروح...
واجيك بحسبه حداري...
وارد بين الكصب مشحوف,
ويطك مني الضمير شراع للوادم سفر!
ولعيونك أمر بين القوافي صور!
مطر...
مطر...
زراكك يلتم بروحي ويظل جيسة برد للصيف,
ترس روحي العطش,
والملكه صبح وطيف...
أريدك ساعة الغربه حبيب وسيف!
اريدك طيف...
وبنومي تفيض دموع,
ولو حزني ثجيل وما تبرده دموع,
مو كلبي عراق التنبض انهاره حزن وشموع!
وتلمع ع القميص دموع...
واحزن يضحك الصفصاف,
ولك حزني ظلام ودربه ما ينشاف!
أخاف...
أخاف...
أخافن حتى من روحي انه بلياك,
سيفي يعارج بروحه انه بلياك,
أركص...
يركص خيالي لهب ع الكاع,
أكعد يشهك خيالي عليه بساع!
وأسولف للظلام هناك...
يلمع للحجي ويموع...
اذبن روحي فد خطوه,
واسولف للظلام يموع!
بكل خطوه اسولف للظلام يموع!
واجيك انه بدرب مظلم...
كل خطوه الحجينه تموع,
وصدك لو رجف كلبي,
تطك وسط الشواطي شموع!
وتلمع ع القميص دموع!
واطيحن لك جمر يبجي الثلج وياه,
ولو نهر الفرات تغير بمجراه...
يعرضله ضميره ويرجع بممشاه!
يوكف للحزن وتفيض اهلنه دموع,
ولمض بالكوخ ضي السيف...
ما مش للمضايف ضيف!
وتموع الليالي بنوم...
تنطر للصبح فد طيف,
ويضحك للهوه الصفصاف!
أخاف!
أخاف!
أخافن حتى من روحي انه بلياك!
أجيلك بالحلم تبقى الليالي وياك...!!!
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة