اغاني الماي
ثقافة شعبية
2019/04/19
![...](/uploads/posts/alsabaah-10602.jpg)
+A
-A
علي عبدالرضا
سَلام الله اعله كل شِفه ارتوَت بسمَك
سَلام الله اعله كل مَوعِد جِزه بدَمك
سَلام الله على الثوب الكِله امتونك
سَلام الله اعله كِل شباج من عنده اشتعل لونك
ومطر ينزَخ على الجامه وجِدَح خَدَك
عبر جيل وجِدَح خَدَك
ضم حسنَك غِزاني الحُب
شِعَلت الكاغد بروحي وهواك الهَب
يَمَن شِفتَك جَمر يلهَب
يَمَن عشگك خذاني من العدم للرَب
يسبحانَك تهت بين الدروب هناك
وعيونك حضن ترسم
اخذني من الشريعه مراد واچفيني اعله كل مَوسِم
اخضرلك عشگ شَعبي ومواويل وشعر يحلَم
وافيضلّك واصليلك
بعدني اشعل عشگ روحي لبرد عينك
بعدني ويه الموسيقى الگاك تعزفني واغنيلك
بعدني اتونس بشوفي ويه كل ضحكه تفز منك
سولفني....
اتجاهاتي تِلم عشگي وتجي تعبدك
يامنبع اغاني الماي
اشتلني بترانيم الجروف فياي
ارسمني قَبل وجهَك اجيسك من وره ضنوني
الِم آخر حبر بسمك واكتبَنّك قبل لوني
وافز ويه السحاب البيك فختايه اعله سدرة بيت
الِم تَعبي واجيك من المواگِد صيف
اطيح من اندل عيونك
واتاني بروحَك تلمني حلات الريف
اشِب والواقع يغثني والاگيك اّبقايا الطيف
مدفون أبقايا الطيف
وارِد اتلاگه بعيونك واطيح اردود
مايجزي العشگ بالروح
شيضم العشگ وافكاري تتمرجح عَزِف بالليل
وچفوفك ولا يمي
تَعب يستوطن بفكري ويه وهواسي
وحلاتك ذيچ مو يمي
چا المن تِهت بيه...؟
چا المن..؟
خَذيت عيوني يَم خصرك صلاة ذنوب يوميه
وانه بلا وَعي بلونَك
سلام الله اعله كل آدم قره عيونك
وطن تايه بصابيعك يغازلني
وحلم چفي على متونك
زمن من الضوه لّجام
حلاتك تترس عيوني عشگ واحلام
وچفوفي شعر والحان
غَنيني ضوه بسرداب نتشابگ ضوه ودخان
اجيسك ولشبگ الدخان
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة