بسام الوردي
كليبي فانوس..
وضواه احمر.. وباطباعه نذل
كليبي اليحبّج طفل..
كلّش طفل
وآنه خايف.. صدك تتعودين لفْراكي
ويصير اسمي على شفافج سهل؟
صدك تبزعْ من ضواها العين
وتمل المشاحيف الكحل؟
صدك تنسين السوالف؟
يالطواريّج بكلبي سلالٍ طيب
واسمج بدمي أهجْسه
يالضحكتج تملي صدري ورود ريّانة
وأصابيعج الخمسة
تمسح أهدابي بحلم
ياخذني لبْلاد البعيدة
وأصحى وألكاج شحلاتج
إمّشْطة وترفة وجديدة
شلون ما أعرف.. شأوصفج
شوك وتزوك وزم على الشفايف
وآنه خايف
إيغرّج.. الشيطان ويزعلجْ عليَّ
روح وشبيها بعد تحمل أذية
كتبت اسمج
شبّت حروفه وورد فوك الدفاتر
كتبت جِلمة
ما أظن مرّت كبل عِشرتنا بأسرار الضماير
وآنه خايف
أرد اكلّج بيها يمنعني دلالِج
خايف يزيدْ ويذب روحي على زود العشِك وأغرك
وهذي مو روحي.. حلالج
