سعد صاح
شهر واحد في السنة للاختبار، مخصص للحصانة والتأمّل والمحاسبة والانقطاع، والامتناع عن الملذات المادية المتوفرة، والتفرّغ للعبادة وقراءة القرآن الكريم، والصبر على الجوع والعطش والرغبات.
هل رمضان الغالي هلاله/ والوادم فرحت بسلاله/ سلة خوخ وسلة برحي / وانه الصوم يطيب جرحي / افرش فوك الماي البارد جنحي / والصايم للرب هنياله / بين اليسجد بين الينهض واكف / يفهم كلشي بدين الرب وعارف / لوحت يصبح شطنه من المي ناشف / ربك ما ينشف شلاله / كلمن كاعد بين خوانه / كلمن يقره شكد ما يكدر من قرآنه / كلمن ينطي وياخذ من خلانه / بيهم يهوه التبسي وبيهم ياكل من هاي الطرشانه / كلمن وزع رب العالم يرفع شانه / ممدوده السفرة ومليانه / والجايع يشبع من حاله / كلمن مالم يوم العازه ذراعه / يلوي الريح ويعبر ذاك الصوب شراعه / كل خلاني وكل احبابي وناسي واهلي / تنسى الدنيه بشهر الرب وتبقى تصوم وتبقى تصلي / كلهه بجيتك تبقى تصيح وتبقى تمرحب تبقى تهلي / اهلا اهلا شهر الخير وشهر الطاعة / غيرالطيب وغير الحب وغير الود وغير العشره / غير يصوم وغير يزكي ويطعم هاي الطفله السمره / غير يوادد غير يساند غير يجاهد / ضد كل واحد قاتل هاي النفس الحره / شنهي بنادم يوم الاخر شنهي متاعه / لو قامت يابويه الساعه / عادل تدري بحكمه الباري / يطلع كل مغطى هناك وكل مضموم يبين ثاري / تشهد روحي وتشهد ايدي وتشهد رجلي وتشهد داري / وتشهد نفسي وتشهد عيني وتشهد طوفة طين الجاري / تشهد هاي الورده الحمره ويشهد هذا الماي الجاري / تشهد حتى رموشي / ويشهد حتى زراري / جنه وحور العين الكلمن فاتح يوم كتاب وقاري / بس للغادر بس للكافر هاي النيران اللساعه.
عبادة
شهر رمضان المبارك يغمر الوجود بالبهاء والانوار والجلال ، والانسان الحكيم الذي يبتعد عن الاهواء ، ويفتح نوافذ الروح الى نسائم الايمان ، ويديم الصلة مع الخالق بالدعاء والمناجاة والاحسان الى الفقراء .
ساعد كل الناس الفقره / ساعد كل الناس التاهت وسط الصحره / ساعد كل الناس الجانوا مغصوبين بيوم الهجره / ساعد كل الناس الضاعت وسط الليل ومامش كمره / ساعد كل الناس الطاحت نص سرداب بوسط الحفره / ساعد كل الناس الراحت ما بين الغابات بسفره / ساعد كل الناس وعاين صوب الرب بنظره / شوف شلون الذنب الاصعب عندك راح بساع يغفره / كد ما تكدر طفي اللهبه / كد ما تكدر طفي النار التسعر بين كلوب الناس الغربه / كد ما تكدر عين النخل الطايح / ضمد ذاك الجرح الينزف صار سنين بداخل كلبه / كد ما تكدر رد للعاشك روحه ورجع حبه / كد ما تكدر واسي الحاير/ كد ما تكدر واسي الانسان المصلوب بخشبه/ كد ما تكدر دير بشفة ذاك الضامي الكطره/ كد ما تكدر دوس بيوم الريح الجمره / حارب ذاك الملك الطاغي وزيح بجفك تاجه / لا لاتخاف الظالم لابد يوم تطيح ابراجه / لا لتسد جفوفك حيل وتبخل / لليطلب من عندك حاجه / زين شما تكدر للعالم سوي / قنديل بكل شارع ضوي / مال هدوم وزاد وكل ما رادوا منك مطلب / وزع للناس التتعذب / وزع للناس المحتاجه/ كحل عين العالم هاي التربي / طلع هذا الداي النايم جوه بكلبي / فرح وادمنه المنتظره / كلمن خايف حدر جناحك ظمه / كلمن لاذ بدارك هارب لا لتسلمه / صاحب روحك لا لتبوح شما طلبوا عنوانه واسمه / لا لتدليهم عن بيته ولا تكشف للشامت رسمه/ لا متفيدك تشتم هاي الظلمه وذيج الظلمه / لوما تشعل روحك وسط الليل الدامس نشره / اعرف نفسك حتى من الجنة تمل / اعرف شخصك مثل الشبح اليتبع وسط الصحراء الظل/ اعرف كلبك جان باهل الشوك يدلل/ اعرف هذا العالم مثل الورق الخاسر/واحد يصعد واحد يعثر واحد ينزل/ جدمك يمشي بدرب الناس الواضح/ لكن غيرك بالخطوات المحسوبة يزل/ بارك هذا الطير الوردي الصادح / لا تذبح طيره ولا تكتل بالكسرية البلبل / لا تكسر بجفوفك غصن
الشجره .
