رياض النعماني
إمنين أجييك؟
إمنين أجيبك... والورد ضمك علي أسنين
والغيمه الزراكيه الشرد بها الخريف أبين الشبابيج
تسهر بيك للقداح،
وتسولف للفناجين،
وتنكطك حلى فوك القصايد،
انت لو ما نقطت يا روحي تحت ( الباء )
جا كلمة الرب لليوم ظلت فارغه من المعنى ظلت
جا بقى عمر البشر ليل
وبجي
وبلايه حب
كبلك الحب ماله ديره، أولا مدينه، أولا هو حب
أولا بساتين الهوى... مر الهوى بيها، وسكر بالتين
بلبل
بغيرك المعنى بلا معنى
وأنا ما مش
أنا حزنين.. وإتلاثه.. وثلثميه
برد كهوه انطفت بالغربه..... كلمن رجع لهله
وآنا وحدي.. لا أهل
لا بيت،
لا شوك اليدفيني ويلمني
ديرة ألحبيتها.. وك ضيعتني
بعد ياهو بليل هالغربه إيعرفني،
ع الرصيف..،
وظهري للكهوه.. ووراي الريح واكبالي
البحر بالظلمه جوله
جوله ترسم صوت ذيب... أيصيح،
ويلم الضواري، وآنا وحدي
ومنهو إلي؟
جوله.. وتجن العواصف... لا ضوه،
لا باب،
لا شباج
لا كطرة ندى
لا من درب ضيع ادروبه، ومر علي
أمنين يا كلبي طريق البيت ؟
وامي الواكفه ع الباب.. تحضني وتشب دموع
- وينك
يا بعد روحي على أفراكك عميت
خضر النسيان بغيابك على البيبان
خضر النسيان بثيابي وعلى ضلوعي عشب
وأنت بعيد..
أولا حسبت احساب كلب أمك
يبعد أمك وإجيت
أوووووووووووف
لو تدري الضواري أشكثر بغيابك إجوا سألوا عليك
دوروا إثيابك، وريحة ريحتك، والكتب
والقمصان،
دوروا شيبه.. شيبه العمر
خافن بيه كلمه ؛
لو ضوه من دمع عينك.. بي أثر منك نسيت
دوروا العام اليجي
وبعده اليجي
خافن تجي وتضمك امن عيونهم غفله ومنام
وجيه اشم إثيابك الضميتهن بعيوني كل ليله
كبل ما نام.. عرفوا ريحتي، من ريحتك
يرويحتي،
ودوروا منامي والأحلام
همه عرفوا ريحتك.. يا ريحتي
وريحة هلي،
ريحة النخله وغرام الطيره التغني إلي
ما نسوا كل شي، ونسوا كل شي نسوا
انت كل هذا العليه لساني أعيش
انت كل هذا الهوى.... وكل
الضوه
كل الفرح
كل الحزن
كل البرد
كل البعد
نومة الصيف، وجرف لذة السعد
ريحة الماي، وبساتين الزغر
لعب كل شوك العمر
وجيه يبعد الروح صار إغيابك بلون الهجر
آنا لبست الهجر حجلي
ومعاضيدي
وتراجيي الشذر،
يا بعد عمر الغوى
وكحل الهوى
وعرس العمر .
