أحلام غارقة
ثقافة
2019/01/11
![...](/uploads/posts/alsabaah-3139.jpg)
+A
-A
عادل العيساوي
ليل هندس
والشمع باخر حياته
والصبر مايملي كاس
فاركيتك والمفارك
تكبر ولايات حزنه
ويطفه بعيونه النعاس
شكثر رادتك روحي
وشكثر غنتك روحي
وياهو يفهم لحني بعدك
غنوة الشجره حبيبي
لاتظن يفهمهه فاس
شلون اهده
الشوك يمتد بيه حركه
وروحي يبست وركه وركه
واشتهيتك ياخضاري
ودوريتك وين ماعد الله ياس
اوين ماعده الله ناس
ومالكيتك
مالكيتك
مدري ياموت الخذاك ويادرب رتل منيتك
ومدري ياجف الاجاك وباكك من عيون بيتك
مثل لونك
ونيته جانت ماتشبهك
النهر راي
وانت جنت بغير راي
هوه راد يبوك روحك
وانت كل نيتك تصلي
هوه مايدري النوارس
ترفه وتصلي على ماي
النهر لوقاري عينك
النهر لوقاري كلبك
جا فهم شنهو التريده
وجان مافات على صدرك
وبلل بروحك قصيده
وطشر احلامك حبيبي
تحت كل روجه مشاعر
وتحت كل روجه حلم
والتكتلك
النخل ذاك التحبه
والشجر ذاك التحبه
واكف يباوع عليك ومافزع فزعت بلم
شرايد اجي وشرد اكول
واني طايح بس اعاند
مالي حيل وانته تدري
الشذر من تطفه روحه
يبوك من صحت الكلايد
وينك انته
بيا سمه ياطويري الابيض
وين اشوفك ياله كلي
كبر حزني خلاف عينك
والخذو جامع فرحته
وين ضحكاته تصلي
يانبع برمال روحي
تزود بيه شما اكولك
ياشعر يشفي الغليل
وياقصيده تغطي طولك
شلون اخفي دموعي بعدك
والحزن عابر هدومي
الموت من نزل ستاره
بيده طفه شموع روحك
وسد شببابيج الضوه
الجانت من ابعيد تومي
روح روح مودع الله
ياحبيبي مودع الله
هناك تعبك مايضيع
هناك شعرك مايضيع
هناك تلكه حسين يبجي
لمن تقراله قصيده
وبيهه عبدالله الرضيع
لاتظن انساك لحضه
يااعز واغله حبيب
شمابعد عن عيني ريلك
تبقه بضنوني جريب
وماتغيب
ماتغيب
هذا حزنك بيه بين
وهذا جرحك بيه بين
(وكاس فركاك على راسي تبده شيب)
أخبار اليوم
![](/uploads/posts/2024-08/09b4b0c0-cc77-457b-9c17-e3965cf4ab56.jpg)
مراقبون تونسيون لـ"الصباح": زيارة السوداني مهمة لتعزيز العلاقات الثنائية
2024/08/29 الثانية والثالثة